Melvin Tromp di AVP PUEBLO DI ARUBA TA SCLAMA CU NAN NO POR MAS.

ORANJESTAD (AAN); Segun Melvin Tromp di Partido AVP, pueblo humilde aki manera e partido na mando aki semper a yama nos ariba e pida baranca aki dia pa dia tin cu sinta y scucha y mira e hendenan responsable pa guia e Pais aki na bienestar di e pueblo aki awe un biaha mas ta cana pretende cu cos ta un tiki bruha pero e ta bay percura pa drecha e situacion, si den 6 aña di tempo bo a causa un crisis financiero pa e pais aki ta cu kico e gobierno aki ta pretende di bay drecha si ta nan a derocha miyones di Florin, placa di pueblo anto awor ta papia di bay drecha cos.

   SOLUCION CU KICO Y CON: Si bo gobierno a percura pa plunder den e caha di pueblo cu awe a conduci cu e situacion financiero di e pais aki ta pasando den e historia di crisis di mas horible cu e pais di Aruba a yega di conoce.

   Awe ta pueblo aki mester responde y biba cu e situacion dificil aki y ainda mas nos mester bay entrega atrobe for di nos cartera pa motibo di un mal gobernacion di MEP un biaha mas, un gobierno cu no tin e pueblo aki na promer lugar pero ta percura pa nan azota e pueblo aki cu hopi medida pa nan di MEP ahustacion perhudicando nos hendenan simplemente pa yega na mas placa anto ta papia di soluciona, bisa pueblo ta cu kico bo ta bay soluciona y con, mas ahustacion?

   HAMBER Y MISERIA:  MEP a percura pa trece un inquietud riba e pais aki simplemente pasobra mester a cumpli cu famianan abase di contractonan lucrativo, proyectonan hopi dudoso pa loke ta regarda prijs, huurmento di edificio di famia, pagonan na oficinanan di abogadonan como famia, nombracion politico cu salarionan barbaro, contractonan otorga na amigo y famia, cu otro palabra preveligia esnan como famia y amigonan, compinchi y awe mas cu nunca e Pueblo di Aruba ta pasando hamber y miseria pasobra e pan cu mester ta riba mesa di cada dia no tey.

  Ademas, no tin atencion di parti di gobierno pa cu e problema aki y ainda tin politiconan cu ta expresa nan mes cu cos ta bay drecha, cu den 6 aña boso no a drecha pero boso a percura pa crea e desaster aki anto ta papia cu cos ta un tiki bruha pero ta bay dreche, foei! ainda boso kier busca moda di tapa e wowo di e pueblo aki cu lodo pa sigui djodjo cu e placa di pueblo mientras cu pueblo ta pasando den miseria y hamber sin un salida.

  BIDA TA IMPAGABLE:  No obstante cu e gobierno aki cu a priminti cu Nos Si Por Mas, awe mas ainda pueblo ta esun cu ta cargando e dolornan causa pa e gobierno aki cu a resulta di ta un gobierno anti humano cu no ta sirbiendo e pueblo aki den un forma loyal y honesto y ainda nos ta mira cu tanto e mandatarionan aki di MEP conhuntamente cu e 11 bulldozer den parlamento ta halando tur tipo di paso pero contra di nos hendenan haciendo cu e bida di nos hendenan a bira impagable treciendo cu e situacion ariba e tereno social tambe a crea un impacto negativo cu ta nifica un aumento drastico financiero y impagable den e bida di nos tur ariba e pida baranca aki.

   Cu esaki nos di AVP kier a seÁala cu e situacion aki no conoce clase di hende paso aki ta tur hende ta sufri, rico, mediano, pober di e desaster cu MEP a percura pe despues di a priminti cielo y tera y awor ainda ta cana cu promesa falso cu cos ta bon y cu e parti financiero bruha ta bay drecha, eronia di bida of esaki ta tapa wowo di pueblo? Despues cu e gobierno actual a percupa pa crea un situacion caotico financiero aki.

  DOLORNAN CU PUEBLO TA BIBA CU NE:  Mientras cu e pueblo aki ta sufri pa motibo di e desaster cu e gobierno aki di MEP a percura pe, nos por mira dia pa dia cu mas ainda e dolornan cu ta refleha den nos communidad simplemente pasobra e gobierno aki no tin un vision y te cu awe nos no ta mira un iniciativa di parti di e gobierno aki pa suavisa e situacion doloroso cu e gobierno aki a percura pe.

  Pasobra simplemente e gobierno aki no tin e sintimiento humano y esaki ta hustamente e motibo tambe cu na momento cu nos partido AVP a mira e necesidad pa intermedia den e dolornan cu e pueblo ta biba aden pa motibo di tur e ahustacion cu e gobierno aki di MEP a implementa riba e pueblo aki a presenta un amienda den parlamento cu atrobe nos a mira 11 marioneta sin weso di lomba traiciona e pueblo aki un biaha mas.  Evitando asina pa saca un man y yuda e pueblo cu e tantisimo aumento cu nan a percura pe y asina nos ta papia di drecha cos.

   Nos di AVP kier pa e gobierno aki cuminsa na admiti cu e gobierno aki no tin e forma y e capacidad pa goberna e pais aki y pa nan evita mas dolor pa e pueblo aki.

   CONCLUSION:  Cu tur e problemanan cu consequencianan fatal pa cu e pueblo aki cu e gabinete Oduber 4 a percura pa  occasiona contra di e principio di e pueblo aki nos por determina cu aki ta un conclusion so por alivia e pueblo aki di su dolornan tan anhela.

  Pasobra e efecto aki no ta perhudicando un solo clase di hende pero aki ta trata di nos tur, un problema nacional cu ta frena e oportunidadnan di nos hendenan na promer lugar cu consequentemente e bida aki di nos hendenan lo no ta pagable mas.

   Ademas e impacto negativo social lo bay empeora y e unico salvacion ta cu e gobierno aki mester tuma su conclusion y duna balor na e pueblo aki cu nan por escohe un rumbo nobo cu un gobierno nobo cu si kier traha na bienestar di e pueblo aki yena cu e bondad cu e pueblo aki por respira un aire nobo y limpi for di representantenan di hende cu conoce e balor di nos hendenan y no manera e traicion cu e pueblo aki ta experienciando den man di e gobierno actual.

 Back