|
|
|
|||||||||||
|
 |
ORANJESTAD (AAN) -- Inspector di Polis señora Vanessa Kock, di Departamento di Trafico, a worde acerca pa DIARIO relaciona cu e situacion di hortamento di auto, cu a lanta cabes masha pisa na Aruba. Inspector Vanessa Kock a menciona cu esaki ta un problema pa cual un par di aña pasa a lanta un team, cu ta dedica su mes completamente na traha riba e situacion di hortamento di auto. Aworaki tin un team cu ta consisti tambe di hende cu experiencia riba e tereno aki, pero cu ta traha entre otro, riba e problema di joyriding. Inspector Kock a subraya cu di parti di KPA nan ta haciendo lo maximo, no solamente for di departamento di polis uniforma cu ta e promenan cu ta yega den casonan asina, pero tambe pa loke ta trata Departamento di Recherche y e team cu ta encarga specialmente cu e problema specifico aki. Inspector Kock a bisa cu nan ta haciendo loke nan por haci, y diferente detencion a tuma lugar, pero nan ta keda haya mas caso diariamente di “joyriding”. Pero no ta esaki so ta e problema cu tin na Aruba, pero diferente otro caso cu nan tin cu traha riba dje y parti e personal cu nan tin disponible, entre e diferente asuntonan aki. El a bisa cu di parti di pueblo ta bin diferente comentario y critica, unda cu e hendenan cu ta perde nan auto ta trece dilanti cu esaki ta un gasto grandi pa nan, pasobra no solamente nan ta plunder nan auto, pero nan ta horte y tin di nan cu no ta haya nan auto back. Esaki ta un situacion cu diariamente nan ta topa cune, pues no ta algo nobo pa Polis. Inspector Vanessa Kock a comenta cu tin diferente grupo cu ta comete e delito aki. Tin cu ta horta un auto pero ta trece back, pero awendia mas tanto nan ta horta auto pa usa e piezanan. Autonan ta worde cambia di color, nan ta cambia completamente e body di auto pa keda use, of nan ta horta e piezanan di e autonan. Den termino policial nan ta haya e actonan aki “auto-criminaliteit” y por ripara cu ora piezanan ta worde horta pa pone nan den otro auto, e ta worde haci den grupo. Esaki ta un problema for di pasado caba, awor a bolbe lanta cabes y e ta creciendo, y polis tin atencion pe. Inspector Kock a indica cu si nan ta gara e hendenan y nan ta worde cera, ora nan sali back nan ta sigui comete e mesun delito, pero tambe ta asina cu tin otro gruponan ta cuminza concentra nan mes riba e problema aki. E dama a agrega cu pa loke ta trata castigo Ministerio Publico ta purba di haci lo maximo, nan tin nan criterio ora nan ta pone castigo riba cierto delitonan, ya cu nan ta wak e delito y no solamente con e auto a keda, pa nan por yega na e strafe concerni. Inspector Vanessa Kock su conseho na pueblo ta pa esnan cu por a bira victima di hortamento di auto carga un tiki pasenshi, pasobra e team encarga cu esaki ta haciendo su maximo esfuerzo, y pa e personanan cu ta coriendo nan auto pa no lague habri, y si nan ta pensa den direccion di choller cu por kibra auto, pa no laga cen zomaar benta den auto, cera e auto semper na lock, si ta posible pone un alarma, y laga e auto den un caminda menos insigur, pasobra como pueblo tambe mester haci algo di nos banda. Diariamente, e departamento concerni ta haya victimanan di joyriding y nan ta trahando riba e casonan aki, y nan ta bezig tur dia ta detene personanan sospechoso cu tin cu bay despues dilanti huez. Kock a bisa cu e aspecto di prevencion ta bira cada bez mas dificil den e temporada aki pero polis ta purba mas tanto posible di haci algo riba dje. El a remarca cu generalmente, esnan cu ta horta auto ta hobennan. |
||||||||||
|
|
||||||||||||
|
||||||||||||
