Tin indicacion fuerte cu: COMPANIA IMPORTANTE NA ARUBA A KITA 60 ARUBIANO CU “DRUG TEST” POSITIVO

ORANJESTAD (AAN) -- For di fuente fidedigno, DIARIO a ricibi informacion cu den un empresa hopi importante na Aruba, den cual 90% di su trahadornan ta Arubiano, nan a dicidi di haci dos “drug test” na manera di sorpresa, kiermen, sin a pone ningun hende sospecha cu esey lo sosode.

E prome “drug test” a trece como consecuencia e retiro di 40 trahador, nan tur Arubiano, debi cu e resultado di e test a sali positivo. Despues di un luna y pico, e compania a bolbe haci otro test y e biaha aki ta 20 trahador a worde kita, y atrobe ta hende local.

Nos informante ta haya e caso aki masha lamentable, y su pregunta ta pakico nos mes hendenan ta haci daño nan mes y nan famia? E argumento di e trahadornan ta cu nan trabao ta hopi pisa, cu nan ta traha 12 ora largo (tin biaha mas) y pesey nan a dal cierto substancianan pa tene nan lanta.

Nos fuente di informacion ta kere cu nada ta hustifica hende productivo pa usa droga, y perhudica nan mes na un manera asina. Si e compania a tuma e decision di haci e test ta pasobra posiblemente nan ta nota cu tin hende cu no ta rindi den nan trabao manera mester ta, y ningun area di un compania por funciona cu e rindimento abao di hendenan cu ta bin trabao bao influencia di droga.

Ademas cu e personanan aki ta perhudica nan trabao, nan ta perhudica nan mes y nan famia, pasobra awor tin un grupo di 60 hende mas sin trabao, locual por traduci su mes den un problema social mas grave, kizas mas choller riba caminda, mas ladronicia pa afecta nos comunidad, y mas necesidad di importa trahador tambe.

E situacion di infiltracion di droga den nos pais ta un problema sumamente serio, y segun nos fuente di informacion e no ta mira cu gobierno y comunidad ta completamente conciente y e no kier pa na Aruba tambe nos “laga e baca hoga” prome cu haci algo, manera e ta kere ta locual a pasa na Curacao, unda cu criminalidad a yega na e limite cu malhechornan a drenta den Misa y den cas parokial pa horta, y a tribi di mata un Pader, lagando nan pueblo den un shock total.

Ta preocupa nos informante cu Aruba su desempleo ta aumentando, y ta secreto publico cu hopi tienda a cera, cu e zona comercial di Caya Betico ta casi pa disparce, costo di bida ta aumenta dia pa dia y fuera di keha pueblo por haci net nada pa frenta e situacion, y e problema di drogadiccion tambe ta subi.

Banda di esaki ta conoci cu na Aruba tin hopi arma ilegal ta circula, pero polis no por actua pasobra no tin suficiente autoridad y fuera di esey gobierno tambe a stop di paga overtime pa Cuerpo Policial, di manera cu e control riba criminalidad y e seguridad pa nos pueblo y nos turismo (cu a cay hopi) ta bayendo atras.

Na opinion di e fuente di informacion, polis mester haya autoridad pa listra tur cas riba nos Isla y confisca tur arma ilegal cu worde haya, anto di eynan cuminza combati e problema di droga aplicando ley pa esnan cu ta ser haya culpable di traficacion y benta, y mesora bin cu un sistema obligatorio di rehabilitacion cerca esnan adicto, y redobla e campañanan di prevencion pa loke ta trata nos muchanan.

Pa finaliza, nos informante a mustra su temor cu den e mundo di droga aki na Aruba lo por tin hende di esferanan halto envolvi, personanan cu apariencia di “intachable” cu den realidad loke nan ta, ta “intocable” pa nan rango, y cu kizas ni autoridadnan concerni por mishi cu nan.

Back