W.E.B. ARUBA N.V. TA HISA TARIFA 12%

A base di aumento den prijs di fuel oil.

ORANJESTAD (AAN): E compania W.E.B. Aruba N.V. a haci e calculonan necesario pa determina e tarifanan di awa y electricidad pa luna di juli. Manera publica anteriormente e aumento di prijs di fuel oil riba mercado mundial ta duna un average di riba 60 Dollar pa bari pa juni. W.E.B. Aruba N.V. a uza un average di 52 Dollar pa bari pa calcula tarifanan pa luna di juni.

   Un diferencia di 8 Dollar y cual a costa W.E.B. Aruba N.V. miyones di Florin p’e luna ey. Pa evita un otro diferencia grandi pa juli, Gerencia a determina un average di 63 Dollar pa bari pa calcula e tarifanan pa luna di juli.

Esaki ta un prijs average pa bari di fuel oil cu ta incalcula un posibel aumento di 5% den e prijs di fuel oil pa luna di juli. Asina ta trata na baha e impacto repetido di e aumentonan constante di e prijs di fuel oil riba e finanzas di W.E.B. Aruba N.V.

   Pa e consumido esaki ta nifica cu entrante 1 di juli 2009 e tarifa di awa y electricidad ta subi cu ?12%. Ta keda vigente e areglo cu esnan cu ta uza menos cu 12 ton di awa pa luna no ta mira cambio den nan tarifa. Pa 2009 esaki ta nifica cu casi 50% di nos cliente ta keda haya e tarifa valido desde mei 2005, cual ta un tarifa basa riba un prijs average di fuel oil di 35 Dollar pa bari, y ta hopi mas abou cu e 63 Dollar valido aworaki.

Ta mitar di nos consumidornan ta sinti e efecto di e aumento aki. Mester bisa cu e consumidor a cuminsa baha nan consumo pasobra e percentahe di esnan cu ta uza bou di 12 ton di awa pa luna a subi atraves di añanan:

   Aña 2006:  tabata 41% di e total ta uza menos cu 12 ton pa luna.

   Aña 2007: tabata 41.5%.

   Aña 2008: tabata43.5 %

Y e aña aki 2009 e ta 50%. Un indicacion claro, cu nos consumidor ta mas consciente di e uzo di awa y  ta maneha e uzo di awa  mihor y baha e demanda pa awa. Esaki ta e manera mas efectivo pa baha bo gasto di awa.

W.E.B. Aruba N.V. ta apoya e desaroyo aki y nos lo sigui traha pa baha nos consumo di fuel oil y baha e impacto di e aumento di prijs di fuel oil riba tarifa di awa y electricidad. Asina yuda nos comunidad y economia di Aruba. Esaki ta tuma su tempo pero nos ta riba e bon caminda.

Back