Sindicato IOWUA a afilia oficialmente cu USW International Union

ORANJESTAD (AAN): Diaranzon anochi, un firmamento historico a tuma lugar den sala di reunion di YMCA San Nicolas, ora cu Sindicato IOWUA a firma un convenio cu e sindicato mas grandi di mundo, esta “United Steel Workers”, USW.

   Directiva ehecutivo di Independent Oil Workers Union of Aruba a firma e afiliacion cu United Steelworkers International Union, cu ta representa mas di 850.000 trahador na Merca, Canada, y awor Aruba.

   DIARIO a compronde, cu USW lo bay ta trahando hopi estrecho cu IOWUA den e negociacionnan venidero pa un Contrato Colectivo nobo cu Valero Aruba Refinery.

   Negociacionnan lo cuminza den e siman di 18 di September venidero.   Riba e potret por mira d.r.p.d. Francis de Graf (Secretario General), Johannes ‘Boy’ Anthony (presidente, Alison Williams (vice-presidente), y Francis Kock (tesorero).

   Di USW tabata presente Mike Yoffee.  Despues di esaki a sigui un brindis cu e cantidad di miembronan presente.