Grupo disgusta den MEP ta reacciona RUDY NO POR PASA PUESTO OVER PA UN MIEMBRO DI FAMIA

ORANJESTAD (AAN): Atrobe disparate ta sali publica den otro corant, y un grupo di MEP no ta djis guli manda abao!

   E asunto ta regarda Rudy.  Hendenan por corda claramente, con Rudy a laga sa, cu ta dos aña so e ta keda riba e puesto di Ministro cu e tin aworaki.

   E grupo no ta kere e storia, cu hendenan di MEP awor ta haciendo suplica pa Rudy pa e keda full e termino di 4 aña.

   “Nos sa cu Rudy kier a nombra un miembro di famia pa bay ocupa su puesto di Ministro, pero no ta tur hende den Partido a acepta esey.”

   Nan ta insisti, cu si Rudy bay, un otro hende cu a participa den Eleccion 2005 riba lista lo bay ocupa e puesto, y no un famia!

   “Pasobra MEP no ta partido di famia,” vocero di e grupo disgusta a relata na DIARIO riba Diaranzon.

   Tempo cu Betico tabata nombra Hendrik, tabata debi cu e tabata un experto riba Structura Estatal.  Rudy no mester copia e sistema aki!  Ta un payasada e ta haciendo.

   Tin hopi disgusto den seno di partido, pasobra nan kier pa Rudy cumpli cu e palabra cu el a duna.  El a bisa esey na corant y na radio.  E tin di baha na awa, manera el a bisa cu e ta bay haci.  Di con awor e no kier bay?  Si e bay, e kier pa un miembro di famia ocupa su puesto pa salvaguardia cierto interesnan.

   Ademas, ya tin hopi experto riba lista di MEP, cu por haci e trabao kizas 10 biaha mihor cu Rudy den Ministerio di Husticia.  Corda cu e candidatonan aki ta hendenan cu a haya voto di nan mes, y no “voto di Betico”.

   Pa colmo, e papelucho di MEP a laga sa cu tin demasiado hende jong den MEP ainda.  E comentario aki claramente ta forma mahos pa rebaha e candidatonan di MEP cu ta ‘hoben’.

   Pero corda, cu e voto di e hobennan aki a worde haya pa nan mes.  Nan no ta voto cu a worde haya, via di nan ruman of tata!

   Fuera di esey, a worde splica na DIARIO cu tin mas problema ta vislumbrando ainda den e partido glorioso ey.

   NILO KIER SIGUI CU MEDIDA

Awor Matutino DIARIO a haya sa, cu tin problema aworaki den MEP riba tereno di Ministerio di Economia y Finanzas tambe.

   E ta regarda e asunto di medidanan di 2006, cu tin di caduca na December venidero.

   Pa colmo a haya sa cu Nilo kier extende e medidanan aki!  Pues pa nan sigui den 2007, etc.

   Pero e hobennan den MEP ta insisti cu na December, nan mester caba, pa asina Sales Tax drenta na vigor dia 1 di Januari 2007.

   Pues tin hopi problema den MEP aworaki.  Nos ta sostene cu MEP ta un partido di pueblo, y no ta un partido di famia, ni di emisora, ni di un bario.  Corda cu 11 kita 1 ta cero.

Back