HOMBER CURASOLEÑO DEN PARANDA DI DROGA A PERDE STREA DI NORT

 Fia auto di frei y despues presta un tal Choller Macamba esaki.

ORANJESTAD (AAN): Uso di droga na tantisimo biaha a worde treci dilanti pero no tin response di esnan responsible pa e situacion caotico riba nos pais. Ta increible ora un persona ta adicto na droga den kico e ta haya su mes aden, pero despues ora cu e baha for di nubia e ta corda supuestamente mas o menos e efecto di droga a haci cune.

   Esaki tambe tabata e caso cu un homber naci na Curaçao di inicialnan V.T., kende no tin ni pariba ni pabao segun su propio version na polis, awor cu el a haye confronta di a presta cos di hende na tercera.

   Ta asina cu riba Diadomingo den oranan di atardi, e homber V.T. a bay na warda di polis na Noord. E homber V.T. a cuminsa pa menciona na esnan cu a atende cu e tin relacion cu un señora local di inicial L.

   Diasabra el a presta auto di señora L. pa asina e por bay haci diligencia. Pero e homber den su propio palabra a sigui splica polis cu e ta usador di droga anto “pisa”.

   El a topa diferente choller na caminda y asina nan a trip hunto te den oranan di marduga. Diadomingo mainta segun V.T. el a spierta y a haye den un choller house na Playa.  E ora el a bin corda tambe cu el a fia e auto na un choller conoci como “Macamba” pa e bay busca cigaria pe.

   Wel e tal Choller mihor conoci como Macamba a bay cu e auto A-12306 pero te na momento cu V.T. a denuncia e caso, e no a tende ni mira y no sa nada ni di e auto tampoco e choller Macamba corda e cigaria cu el a bay busca.

   Awor  V.T. a bisa polis e no sa kico haci pa cual el a acudi na Warda di Polis ya cu e no sa  tampoco cu ki cara e lo tin cu enfrenta y yega cerca e señora L. pa informe cu su auto “a lala”.

   Tambe V.T. a splica polis cu e tin 7 luna ta biba na Aruba, e no tin trabao e no tin ni adres fiho.

   Y si e bisa e señora den kico el a pasa aden y riba dje cu e auto ta spoorloos y cu ta choller a bay cu esaki apesar cu su persona a fia e Macamba , sigur e señora lo core cune. Anto e ora si e ta keda  desampara.

   E auto ta un Nissan  Sunny color berde numera A-12306 y despues cu polis a tuma detaye di e sucedido nan a yama e señora L. y el a confirma cu el a fia V.T. su auto.

  Con a para cu V.T., Polis no tabata tin informe adicional pa prensa, ni tamposo si acaso mas despues e auto y e choller Macamba a worde localiza pa duna cuenta .

 ACTITUD DI UN MUHER DEN BRASSIERE A PONE BISIÑA YAMA POLIS 

ORANJESTAD (AAN): Un muher desconoci  ta cana rond den cura cu BH.di un cas situa den Caya Tumba.

   Central di  Polis despues di e ricibi e informe aki a dirigi un patruya na e direccion. Na yegada di e unidad policial e agentenan a papia cu un bisiña, el a duna di conoce cu el a wak un hende muher canando rond cu brassiere (‘B-H’), y esaki a lanta strañeza pa cual el a dicidi di yama polis ya cu muher tabata actua straño.

   Pero tampoco e bisiña por confirma na polis si e muher na brassiere a drenta den e cas di su bisiña. Durante cu polis ta papia cu e bisiña ta yega e doño di cas. Mesora hunto cu Polis el a bay controla su cas a listra pero no a localiza e muher  Pero si den un apartamento e muher cu brassiere a drenta, cende airco na grandi bolter paña den un cashi, y el a haci uso di baño, aki tambe nan no a localisa e muher sospechoso.

   Central di Polis un rato despues ta reporta na e patruya cu a drenta informe cu tres pa cuater cas mas leu a señala e mesun muher.

   Ora cu polis a reacciona riba e informe nana bay tira un bista y finalmente nan a topa e muher di inicialnan ISVK  di 21 aña.  E tabata papia cosnan bruha. Polis a hiba e muher rumbo pa Warda, despues pa Servicio di Emergencia na Hospital, y medico a dicidi di mande pa Paaz pa nan evalua situacion di ISVK

Discusion entre pareha

 DEN MADRUGA HOMBER A SACA FUSE DI ELMAR Y LAGA CAS FULL SCUR 

ORANJESTAD (AAN): Patruya di Polis cu ta cay bao di distrito San Nicolas a worde dirigi algo despues di 3’or di marduga na Pos Chikito Complex  unda un señora a keda den scuridad.

   Polis a haya informe, cu un hende segun e sospechoso a bay na e fusebox pafor di NV Elmar, a habri e box aki cu normalmente ta sella, y a kita un fuse grandi.

   E patruya mientras tanto a yega na e adres y polis a papia cu e señora di inicialnan A.A. naci na Republica Dominicana di 43 aña. Segun version di e señora A.A. cu el a confronta problema cu su compañero di bida, kende su inicialnan ta B.F. di 41 aña.

   Durante di e discusion su companero a rabia y a dicidi di bandona cas. Pero e homber  rabia disgusta a dicidi di bay na e fusebox di NV Elmar, y a saca fuse grandi.

   Consecuentemente e cas a keda den scuridad  ni un feneta esun of esnan cu a keda atras no por a weita.

   Polis a yama NV Elmar pa check si nan por bin pone e fuse grandi back, pero e compania di electricidad no ta haci esaki mas den oranan di madruga, pues te mainta nan por pasa!

   Despues cu polis a tuma nota di tur esaki, e version di e señora nan a sali busca den vecindario si acaso nan lo por localiza e homber B.F. y si acaso e tin e fusenan grandi ainda den su poder.

   No a dura mucho cu polis a localiza B.F. den un Bar & Restaurant Chines. Polis a hala atencion di B.F. riba su forma di proceder y el a comprende cu locual el a comete no ta corecto.  Fuera di esey, NV Elmar no gusta pa hende kita e sello y mishi cu e fusenan grandi poni prome cu e meter.

   B.F. a dicidi  bay na e cas y a pone e fuse den e box back, y asina e cas a keda ilumina. Pero pa evita discusion  B.F. a  worde baha na cas di su mama.

Victimanan di joyride no ta interesa den skelet

 MAS CU 150 AUTO COMO HERO BIEU A BAY COLOMBIA 

ORANJESTAD (AAN): Ta berdaderamente tristo ora cu un hende, famia ta traha duro pa logra nan menta din an bida pa cumpra un auto nobo pa despues den corto tempo nan a joyride esaki lagando esaki como un skelet. Con nan lo tin bay haci pa sigui paga banco anto nan mes ta keda na pia. Y pa colmo nunca mas nan no a tende scucha of haya sa cu autoridad a logra pone man riba e bandidonan.

   Si acaso nan worde gara, nan ta mas bashi cu Job. Pero lo mester tin un caminda den nos ley nan cu ta habri e posibilidad cu sea ta cobra e bandidonan, pone beslag riba su herencia y hasta si acaso e ta ricibi onderstand por pone beslag tambe.

   E punto ta cu algun tempo pasa den cura di Polis nan Balashi a worde teni un limpieza. Esaki ta debi cu tabata tin masha hopi vehiculo cual nan doño no tabata interesa pa busca nan mas. Tanto paden y pafor di cura no ta tin ni espacio mas pa pone mas vehiculo a dicidi di deshaci di nan. Y segun informe casi 150 vehiculo via un compania local esakinan a worde transporta pa Colombia como hero bieu.

   Awor atrobe tanto pafor y paden di e cura na Balashi  vehiculo sea confisca, envolvi den accidente ta aumentando. Tin informe cu no ta solamente warda di Balashi ta yena cu autonan pero otro warda nan tambe y esaki sigur ta trece problema.

   Loke a hala atencion di DIARIO, ta cu esnan cu a bira victima di joyride mayoria despues cu nan a constata kico a resta di nan vehiculo nan no ta interesa ni pa saca esaki for di e cura, corda pa hibe cas. Ya cu nan auto casi nada no a resta.  Nan a plunder esey completo.

   Ta pidi tur esnan cu tin vehiculo den paden pafor na warda di Balashi, pa busca, reclama bo vehiculo sino  tin posibilidad cu e tambe lo por worde considera como hero bieu y Colombia den e caso aki lo ta masha interesa den esaki pa nan recycle.

 Back