|
|
|
|||||||||||
|
 |
MINISTER FRIDO CROES A BISHITA STUDIANTENAN NOBO NA ARNHEM
ORANJESTAD (AAN) Minister Plenipotenciario sr. Frido Croes a haci un bishita cerca e grupo di studiantenan nobo cu ta kedando na Arnhem y asina pone su mes na altura di nan situacion pa loque ta regarda nan alohamento na Hulanda. E grupo di studiante a haya camber pa e periodo di un aña na un compleho na Dorpsbrinkerweg.
E stu-diantenan tabata tin algun reclamo pa loque ta trata e cambernan y e hecho cu nan no tin aseso na internet. Tambe presente na e encuentro tabata e dos mentornan di e regio cu ta sr. Egbert de Lannoy, sra. Jeannette Wesselink-Coffi y sra. Ivonne Navas di departamento di enseñansa di Cas di Aruba. Den presencia di e "huismeester" a studiantenan a haya e oportunidad pa expresa nan malcontento pa cierto cosnan di nan camber. E "huismeester" a bisa cu e fundacion cu ta responsabel pa e compleho a wordo poni na altura di e reclamonan di e grupo di studiante y cu tur esfuerzo lo wordo haci - aunque cu e no por duna garantia - cu durante di dos siman lo haci tur posibel pa cu e trabaonan nesesario.
Tambe sra Jeannette Wesselink-Coffi a bisa di a traha un inventario di tur cos cu mester atencion na e cambernan y cu e lista aki ela pone na conocimento di Hogeschool Arnhem. E aspecto di internet ta un caso complica, pasobra ta trata di un disputo cu ta existi entre Hogeschool Arnhem (cu ta haci uso di e compleho pa aloca su stu-diantenan) y internet provider UPC. Segun Hogeschool Arnhem e compania UPC no a suministra internet manera tabata poni den e contract y pesey tin awor un caso hudicial andando entre e dos partidonan. Mientrastanto a constata e importancia di internet y pesey mes lo bay busca un otro alternative pa por haya aseso na internet prome cu nan estudio cuminsa. Durante di e encuentro aki Minister Plenipotenciario sr. Frido Croes a bisa di ta contento di a pone su mes personalmente na altura di e situacion na Arnhem y alabez a bisa cu Cas di Aruba semper tey pa yuda unda cu mester y lo keda monitor e caso specifico aki di aserca. Finalmente sr. Croes a desea tur e studiantenan exito cu nan prome aña di estudio. |
||||||||||
|
|
||||||||||||
|
||||||||||||
