|
|
|
|||||||||||
|
MAS GANADOR FELIZ DI LADIES NIGHT NA HYATT CASINO ORANJESTAD (AAN): Un biaha mas e ambiente den Hyatt Regency Casino tabata fantastico. E ambiente di Ladies Night semper ta haya su climax, ora cu ta saca e premionan.
E biaha aki, e premio di $500 pa gasta na Gandelman Jewelers a bay pa Maria Burleson.
Margaret Parra Muselli a gana e premio di Red Sail Sport. Sandra Cifuentes a gana e premio pa huur un Suzuki Jimny softtop 4x4 pa un dia na Avis Car Rental.
Vivian Stevenson cu su partner, a reclama nan premio di cena pa dos na Cafe Picallo Restaurant. Roselle Berman tambe tabata contento di a gana un cena pa dos na Cafe Picallo Restaurant. CASA DE LANNOY CU DONACION DI UNIFORM ORANJESTAD (AAN): E siman aki a tuma lugar na Casa de Lannoy NV, entrega di uniform na dos representante di Fundacion Judella Geerman, esta FJG. E uniformnan ta destina pa e 4 studiantenan di Colegio Arubano, cu pa aña escolar 2006-2007 ta worde patrocina pa FJG. E entrega a worde efectua pa Kiana y Julina de Lannoy, kendena ta yiunan di propietario Ephraim de Lannoy. Nan a entrega nan na e maestranan Irlen Ramada y Eta Figaroa-Geerman, kendenan ta miembro di directiva di Fundacion FJG. Fundacion ta gradici Enid de Lannoy y Casa de Lannoy pa e bunita donacion aki, y ta sigur cu e studiantenan lo haci bon uso di e gesto bunita aki. S.E.L. MADURO & SONS AMPLIANDO SU FLOTA DI TRUCK ORANJESTAD (AAN): E compania S.E.L. Maduro & Sons conciente pa duna su clientenan cada bes e miho servicio di entrega di carga y mudanza, ta aumenta su cantidad di vehiculonan.
E trucknan aki lo amplia e flota di Maduro Moving y tambe di Maduro Freight Services. Cu esaki ta aumenta e capacidad pa garantisa un entrega optimal y na tempo. Riba e potret por mira e momento cu sr. Hans van Esveld ta ricibi for di man di sr. Tony Hartman di Garage Centraal, e yabinan di e dos trucknan Hyundai. Hunto cu nan sres. Adith Perez, Graceo Dunlock, Geo y Michael . LA CABANA TA SIÑA BISHITANTENAN PA LORA NAN HEUPNAN ORANJESTAD (AAN) : Tur diabierna, e Islander's Grill na La Cabana Beach & Racquet Club ta bira un studio gigantesco di baile. E anochi ta apropiadamente titula "Salsa-Renge", dunando un sabor di e entretenimento di Salsa & Merengue combina cu un cena di buffet inspira pa Cuba cu ta inclui un bar di salada atractivo y tremendo entradanan principal. Ropa Viejas, e plato di carni famoso di Cuba, ta worde combina cu pisca crioyo fresco y Christians y Moors, aros estilo Havana y bonchi preto. Despues e streyanan di Ballet Folklorico Nacional di Aruba ta duna un show di un ora cu ta repasa un repertorio increibel di bailenan Latino, incluyendo e cariñosamente recorda Cha-Cha & Mambo cu ta worde interpreta artisticamente. E bailarinnan di ballet nacional ta un grupo di atletanan extremadamente flexibel. Nan ta baila y haci un ehercicio increibel, hibando e publico cu nan, dunando e mironesnan e sindroom di lora heup pa ora cu e anochi a caba. Nan ta duna les di Cumbia, Salsa, Merenge y di berdad e ta hopi dibirtido, ora cu un tiki di e habilidad di move manera loco ta pasa pa e gringonan cu hopi biaha ta stijf y na cuminsamento no ta move bon. Pa final di e anochi bo ta wak nan ta bay abou mas cu nan mes por a imagina, pa asina compaña nan partnernan nobo di baile. Trece camera ta necesario, y warda un tiki luga pa dessert, e calorianan cu bo ta consumi cu e Tres Leches Cubano automaticamente ta worde kima ora bo participa den e bailenan Latino. GRUPO GRANDI DI A.D.P. TA NA ARUBA ORANJESTAD (AAN): E isla di Aruba a yama bon bini na mas o menos 1,200 empleado di ADP, Automated Data Processing, Inc,. e siman aki. E grupo, hospedando na un cantidad di hotel grandi, entre nan Marriot Aruba Resort & Stellaris Casino, ta consisti di miembronan di e compania su Club di Presidente.
Un total di 36 di e empleadonan ey cu a logra hopi a disfruta di un experencia di cena interactivo Amazonia Churrascaria diadomingo anochi. E gauchonan y sirbidonan a pone e empleadonan di ADP pasa hopi bon mientras cu nan a encanta e servicio na mesa cu tabata non-stop y sin limite.
Mas cu 16 diferente tipo di carni prepara lentamente riba grill, ademas di un bar di salada varia, tabata mas cu suficiente pa satisface esnan cu kier a come hopi of esnan cu kier a come tiki.
Den e potretnan por wak miembronan di ADP disfrutando di e hospitalidad di Amazonia Churrascaria. TRABAONAN PA E APERTURA DI STARVISION TA MOVIENDO RAPIDAMENTE. ORANJESTAD (AAN): Riba tur tereno, e preparacionnan ta ser procesa pa Starvision cuminsa cu su programacion oficial dia Prome di September, 2006. Starvision lo presenta un mescla di programanan internacional (BBC) y produccionnan local. Tambe e canal lo dedica parti di su programacion na presentacionnan religioso. Na e mesun momento lo cuminsa tambe edicion estelar di noticia, esta “Noticia 5” pa 8’or di anochi. Lo tin dos dia di progama na ocasion di e apertura di Canal 5, cu ta situa na Jaburibari, Paradera. Diabierne, dia prome di September, e acto oficial protocolar lo tuma lugar cuminsando pa 8or di anochi, den presencia di dignitarionan y invitadonan local y internacional. Diasabra, dia 2 di September, lo tuma lugar un evento grandi cu musica, show y bandanan, dilanti di e edificio di Starvision, na unda henter pueblo di Aruba ta ser invita. Pa e ocasion aki, lo tin presente varios periodistanan internacional di Television, Radio y Corant, pa cubri e evento importante aki di inauguracion di Canal 5, pa Aruba y pronto tambe lo habri su alanan pa transmisionnan pa diferente parti di mundo. E siman entrante lo cuminsa cu e trabaonan di "landscaping", pa embeyece dilanti y rond di e edificio di Starvision na Paradera. Pues diabierna, dia Prome di September, lo cuminsa oficialmente un era nobo di inovacion den television na Aruba. RENAISSANCE MARKETPLACE A SACA SU DI TRES GANADOR DI NAN CAMPAÑA ORANJESTAD (AAN): Despues di e reciente festival di cuminda, e tombola na Renaissance Marketplace tabata yen. Esaki a demostra cu un biaha mas e evento aki ta masha gusta pa publico. Tur hende presente a haya oportunidad di yena nan coupon pa participa pa un Weekend Stay na Renaissance Resort cu ta worde saca cada dos siman.
Sr. Gregorio Tromp di Boylestraat 1, a resulta e feliz ganador di e di tres weekend stay despues di a bishita Grand Café Tropical y a disfruta di algun cocktail. E premio a worde entrega na Sr. Tromp door di Zugheila Lindeborg, di e departamento di mercadeo di Renaissance Mall y Marketplace. Abo por ta e siguiente ganador di un Weekend Stay na Renaissance Resort. Pa participa ta masha facil, cu cada compra di Afl. 25 bo ta ricibi un coupon pa e proximo sorteo. Keda pendiente pa e siguiente sorteo cu lo tuma lugar dia 31 di Augustus. Ganadornan lo worde notifica durante e programa di Erin Croes na Magic Fm. Ki mihor manera pa pasa un vakantie chikito riba nos mesun isla. MINISTRO PLENIPOTENCIARIO A BISHITA “NUBIAN QUEEN” ORANJETSAD (AAN): Informacion di Hulanda ta indica cu Minister Plenipotenciario sr. Frido Croes, su señora Lourdes Croes y yiu muher Joseanny Croes a haci un bishita na Nubian Queen na Rotterdam. Nubian Queen ta un tienda di cosmetica bou direccion di e rumannan Arubano Corinne y Germaine Hernandez.
E propietarionan a ricibi e mandatario y su famia na nan tienda den centro di Rotterdam. Aki nan e rumannan Hernandez a duna sr. Croes un splicacion di e concepto di e marca Nubian Queen, cu ta un liñea cosmetica specialmente diseña pa tur tipo di cuero; di hendenan color cla te cu hendenan color scur. E productonan di Nubian Queen ta un formula unico cu ta worde traha den nan mesun laboratorio. Banda di e tienda pa bende cosmetica y tratamento pa cara, Nubian Queen tin un “nail shop” cu ta specialisa den manicure y pedicure. Minister Plenipotenciario sr. Frido Croes a gradici e rumannan Hernandez pa e oportunidad pa a bishita nan establicimento na Rotterdam y asina sera conoci cu comerciantenan Arubano aki na Hulanda. E mandatario a bisa di ta sintie sumamente orguyoso di mira e logronan di nos Arubanonan aki na Hulanda y a desea señora Corinne y Germaine Hernandez di Nubian Queen tur clase di exito den futuro. GRAMMYS KARAOKE CLUB A HACI DONACION NA SONRISA ORANJESTAD (AAN): Recientemente prome cu a start cu e competencia semanal di karaoke conoci como “Sing & Win”, Grammys Karaoke club a haci un donacion na e instancia caritativo “Sonrisa”.
Sonrisa ta un instancia cu ta traha na bienestar di hendenan cu limitacion mental. Señor Thomas Tromp presidente di “Sonrisa” hunto cu algun miembronan tabata tey presente pa asina recibi e donacion aki. Giovanni Trim a dedica un cancion na tur e miembronan presente y despues a haci e entrega. Riba potret por mira momento di e entrega. FLEA MARKET PA MUCHA NA CERTIFIED MEGA MALL TABATA EXITOSO, DUSHI Y EDUCATIVO... ORANJESTAD (AAN); ‘Un bunita y bon iniciativa’, ‘E ta siña muchanan pa scoge kico nan kier keda cun’e di berdad’, ‘e ta siña muchanan kico ta un comerciante desde jong’. Esaki ta algun comentario di mayornan y bishitantenan di e mercado di purga cu Certified a organiza pa e ultimo weekend di vakantie di school. Un mayor a comenta cu su yiunan a sinta cu schrift y pone prijs pa e tur e articulonan y haci calculacion cuanto nan por gana y kico na por cumpra pa bay school. Tur esaki ta bunita reaccionnan cu ta duna satisfaccion di organiza un actividad cu ta hopi recreativo, pero tin tambe su parti educativo. Tabatin realmente tur cos, hopi peluche, coy hunga, wega y buki educativo, paña, video, cd cos di cas y hopi mas. Tur cos na prijs super barata y te hasta por nada. Tabata un bunita idea di un mucha muhe cu tabatin dos mat, un cu cosnan gratis y un otro cu cos pa bende. Esaki ta siña un mucha di chikito pa ta generoso y comparti. Di berdad un bunita ehempel cu a haja e premio di comerciante chikito mas creativo pa e hobencita Eshley Lampe. Fransisco Vrolijk a gana un bon como e miho comerciante chikito pasobra e tabata e participante cu a yega mas tempran ya pa 8 or mainta. Caleb Melendez a gana e premio pa e miho display. Jerainne Donata a gana e premio di mistery shopper, como cu el a cumpra conciente, esta henter un set di buki pa siña lesa nobo nobo na balor di 150 Florin pa 125 Florin so. Alexandra Dhooge a gana e premio di comerciante chikito mas popular, pasobra tur hende a gusta su baki di acesorio di 3 pa 1 Florin. Randwain v.d. Linden a bira e comerciante chikito mas convincente, e tabata un bon negociador. Pa tur mucha cu a perde e chens di participa na e rommelmarkt aki, ta informa cu den vakantie di herfst na oktober ta bay organiza un otro mercado di purga pa mucha. GOBERNADOR A TOPA CU ESNAN DI MARINIERS ORANJESTAD (AAN): Diahuebs mainta, Gobernador di Aruba, sr. Fredis Refunjol, a ricibi bishita di despedida di e Comandant di Marinierskazerne Savaneta Teniente Colonel di Mariniers sr.Ing. G. Eerenberg.
Na e ocasion aki Tte.Col. di Mariniers, Ing.Eerenberg, tabata acompaña pa e Teniente Colonel di Mariniers nobo sr.J.R. Mac Mootry. Tte.Col.J.R. Mac Mootry lo tuma e mando over di Marinierskazerne Savaneta entrante 29 augustus 2006. LESNAN NOBO DI TAI CHI TA BAY CUMINSA ORANJESTAD (AAN) : Taoist Tai Chi Society ta bay cuminsa cu 8 klasnan nobo pa sinja e 108 movimientonan di e set di Tai Chi. Esaki ta lesnan pa principiante nan of pa esnan cu anteriormente a cuminsa y pa un of otro motibo no por a termina. Taoist Tai Chi Society ta cuminsa cu lesnan nobo 3 vez pa aña. Esaki ta e ultimo chens pa 2006. Tur principiante ta cuminsa siña e 108 movimientonan na un manera structura y disciplina. Diamars dia 5 di september, diaranzon 6 di april, diahuebs 7 y diasabra 9 di september venidero e promer lesnan ta cuminsa atrobe den diferente districto y cu diferente horario pa tur esnan cu ta interesa pa join of ripiti e promer lesnan di Tai Chi. Nos ta invita tur esnan cu ta interesa pa bira miembro of kier sa kico Tai Chi ta pa bin bishita nos libremente durante nos lesnan regular den siman cual ta ariba dialuna, diamars of diahuebs anochi na Club Caiquetio entre 7 y 9, tambe diamars of diahuebs anochi entre 7-9 na school Preparatorio Prome paso na Savaneta, of diaranzon na Noord, school Basico Washington entre 7-9 or di anochi, y durante oranan di mainta entre 9.30 – 11.30 or nos tin les diaranson na Club Caiquetio, diahuebs na Centro di Bario Lago Heights y diasabra na Club Caiquetio di 9 pa 11 or’. E biaha aki nos ta bay duna oportunidad na esnan cu ta pidi pa duna les mas tempran e oportunidad pa cuminsa 6 or pa 7 or p.m. 2 biaha pa siman, 1 hora di les ariba diamars y diahuebs anochi na Club Caiquetio. Henter e comunidad di Aruba ta worde invita pa bin sera conoci cu Taoist Tai Chi y loke e por significa pa bo salud mental y fisico. Ademas nos kier a informa y invita nos miembronan y tur esanan interesa pa Diasabra 26 di augustus benidero na Seaport Conference Center pa 5.30 p.m. nos lo practica Tai Chi hunto. E lesnan di e grupo di Golden Age (60+) y grupo di Kibrahacha ta continua normalmente aribe mesun dianan y orario di siman.
|
|||||||||||
|
|
||||||||||||
|
||||||||||||
