Camara di Comercio ta kere ARUBA MESTER DI UN GOBERNACION “LEAN AND MEAN”

ORANJESTAD (AAN): Den tur e debatenan di ultimo tempo tocante e medidanan, a critica cu gobierno no ta haciendo practicamente nada pa baha gasto. Gobierno, segun e critica,  ta comportando su mes manera un ama di cas cu ta zundra e casa pa trece un salario mas grandi cas tur quincena, pero no kier baha man cu cierto gastonan di cas cu no ta necesario.

   Esey ta un berdad grandi, pero no ta bisa nada ainda tocante unda gobierno lo mester bay reduci gasto. Ora ta discuti e gastonan di gobierno,  no ta solamente un cuestion di papia di baha nan, sino tambe di kico gobierno ta suppose di haci y kico no.

Punto di salida mester ta un aparato gubernamental cu ta haci solamente trabaonan necesario, na un manera eficiente y cu un minimo di gasto. Un gobernacion “lean and mean”, manera un atleta bon entrena.

   Un prome pregunta lo ta: unda e gastonan grandi di gobierno ta hinca? Sin duda algun e  gasto mas grandi ta salario y pago di pension pa empleado publico.  Riba esaki ta bin e gastonan halto di oficina, muebles, computer, telefon, corriente, etc, pa e empleado publico por traha.

Ta indispensable tene e gastonan aki bao control pa evita cu nan ta come placa cu mester bay pa inversion duradero cu gobierno tin cu haci.  Aunque gobierno sapatea, aki lo mester cuminsa haci algo.

   Pa mantene gasto di salario y pension razonable, tin dos opcion: of mes hopi hende cu menos salario y beneficio (menos pension, p.e.) of menos hende cu mesun salario y mesun beneficionan.

Esey kier meen cu gobierno ta kita ningun hende for di trabao y ta baha salario di tur, of nan ta analiza unda tin personal di mas, ken nan ta y facilita pa nan bay for di servicio di gobierno y sigui nan carera otro caminda.

 Naturalmente cu mester atende mesora tambe e departamentonan cu mester mas personal, pues mester traha un plan completo di henter aparato gubernamental pa mira con por move personal internamente sin necesidad di contrata personal nobo.

   Relaciona cu e plan aki mester haci un analisis di e tareanan esencial di gobierno y esunnan cu por contrata compania priva pa hacinan. Lamentablemente e nomber Hulandes pa esaki (‘kerntakenanalyse’) ya caba a bira algo cu tur hende ta papia di dje, tur hende ta di acuerdo, y nada ta ser haci, pasobra aparentemente mester warda pa bin un batayon di experto Hulandes atrobe pa gana miyones na proyecto di reorganizacion, mientras cu e falta di voluntad politico pa verdaderamente sanea gobernacion ta haci cu un par di aña despues ya e nombramentonan politico sin rumbo ni plan a haci cu no por ripara  mes cu  e batayon di experto a yega di pasa Aruba.

   Ta pesey lo ta bon pa e biaha aki implementa un reorganizacion cu ta aplica ideanan inovativo di organizacion gubernamental y no ta keda pega den tempo.

Por ehemplo door di introduci un aparato central di servicio, cu ta minimalisa duplicacion di trabao na e departamentonan individual. Un bon ehemplo di esaki ta DPO, cu lamentablemente nunca a haya chens di demostra su valor y actualmente ta worde desmantela poco poco.

E motibo ta cu e tendencia actual ta cu cada ministerio ta un gobierno riba su mes. Pero nos  mester wak loque ta conveni e comunidad, y no e politico individual.

back