Mensahe di Carmelita Haynes FORZA Y HOPI DISCIPLINA PA STUDIANTENAN CU A CUMINZA SCHOOL NOBO

ORANJESTAD (AAN); Segun Carmelita Haynes di AVP, apesar di tur e negativismo pa cu e situacion di nos enseñansa en general toch mi kier a trece dilanti cu esaki no mester stroba nos hobennan di haci nan maximo esfuerso pa logra pasa e aña escolar nobo.

  Hobennan mi ta desea boso tur hopi exito y hopi forsa durante e aña escolar aki. Haci boso best pa boso sobresali y prepara pa boso futuro. Apesar cu tin hopi school cu falta material, Apesar cu tin hopi school cu nan edificio ta casi cai den otro, Apesar cu tin hopi school caminda e tereno di hunga pa nos hobennan ta completamente inadecua. Apesar cu tin school caminda e klasnan ta demasiado grandi pa un maestro so. Apesar cu tin school cu ainda no a ricibi nan material di school. Apesar cu tin hopi mayor cu ainda no a cumpra nan uniform pa nan yiunan pasobra placa no ta yega.

   Apesar cu tin hopi mayor cu no sa con pa yena e "lunchbag" di nan yiu pasobra no tin kico pone den e lunchbag( si tin un lunchbag) Apesar cu hopi mayor ainda no a paga nan schoolgeld pa e aña aki  pasobra cartera a keda bashi di e prijsnan halto di awa, coriente, y comestibles.

   Apesar cu hopi mayor no sa con nan lo por paga "opvang" pa nan yiunan despues di school.

   Tog mi ta manda e mensahe positivo pa tanto mayor y nos hobennan cu a bay
school diahuebs. Mayor. prepara bo yiu lo mas mihor cu ta posibel. Laga bo yiu drumi na tempo pa mainta e por sigui su lesnan manera debe ser. Duna bo yiu loke bo a prepara pa pa e hiba school pa come y bebe. Awa tambe ta hopi bon.
    Laga boso yiu ta conciente cu su tarea principal ta pa e haci su best na school. Laga boso yiu sa cu apesar cu cos ta malo toch e mester ta contento di ta na school y di tin e posibilidad di haya les.
   Pone den bo yiu su cabes e importancia di educacion tur dia. Asina so nos por hiba nos pais dilanti. Nos di AVP lo sigui e lucha pa e mehoracion di nos enseñansa en general pero mientras tanto bida ta sigui y nos no por perhudica nos hobennan.

 back