|
|
|
|||||||||||
|
 |
ORANJESTAD(AAN)---- Den e preguntanan di miembro di Parlamento mr.M.G. (Mike) Eman na Minister di Finanza y Asuntonan Economico sr. N.J.J. (Nilo) Swaen, relaciona cu introduccion di “salestax” e parlamentario di AVP, banda di e efectonan riba costo di bida, a puntra Minister tambe riba e concequencianan pa e clima di inversion. E minister ta worde puntra si Gobierno ta di opinión cu tur e empresarionan un biaha mas por wanta cambionan drastico den e sistema di presupuesto riba un termino asina cortico? Tambe ta puntra cu e administración por ehecuta e legislación aki hunto cu eventual cambionan den winst- y inkomstenbelasting. E preocupacion ta existi tambe cu un inflacion di prijs lo bai acompaña pa un inflacion di salario cu finalmente toch lo no por alcansa e “hollende inflatie”. E lider di fraccion di AVP den e contexto aki ta puntra Minister kico gobierno ta kere cu e efecto di e medida aki lo tin riba e clima di inversion? Si e no ta di opinión cu den luz di tur e otro medidanan cu ya a wordo introduci caba den un tempo cortico ( NFR, ALB, Fringe Benefits, cambionan den grondslag y aumento di prima di AZV, aumento di impuesto, AVV y transparencia fiscal) cu un instabilidad extenso di e clima di inversion lo ta e consecuencia? Si gobierno no ta di opinión cu eventual inversionistanan lo para cualkier inversion pa motibo di mas di e sorto di medidanan asina? Tambe e Minister ta worde puntra si e a informa su mes di e consecuencianan negativo cu e introduccion di un “salestax” tabata tin riba e economia di Corsow. Informacion cu fraccion di AVP tin ta cu e percentahe di “salestax” riba cada transaccion lo ta 3%, un calculacion ta mustra cu den hopi caso esaki ta bai nifica un aumento di prijs di 15% pa ora yega na e consumidor. E calculacion aki ta basa riba un averahe di tres transaccion, esta nuebe porciento (9%) y seis prociento (6%) di e efecto multiplicador di gastonan cu e propio salestax lo causa pa cada empresario, na total minimalmente e efecto final lo ta un aumento di diezcinco prociento (15%) riba e nivel di prijs general na Aruba. Esaki ta peor cu 8.2% hunto cu e 7 3/4% di anja 1985. Pueblo lo no por carga e medida aki, Eman ta bisa. Tambe ta puntra ta con e pagado di belasting ta bai wordo avisa? Tin un plan di informacion cu foyeto cla caba? A base di ki consideracion Minister ta kere cu e ABB ta factibel dia 1 di janauri 2007, sigur si tene na cuenta cu Departamento di Impuesto tin apenas 4 luna di tempo pa haci e preparacionnan administrativo necesario. Den e cuadro aki ta wordo mustra riba e echo cu e comerciantenan mester di e tempo necesario pa por trece adaptacionnan den nan administración (bao di cua nan propio IT-problemanan). Eman ta puntra tambe si gobierno a tene cuenta cu e eventual efectonan riba e industria turistico a consecuencia di e nivel di prijs cu ta sigui subi den combinación cu e cantidad di turistanan cu ta sigui baha?. E ta mustra cu tin un cantidad di negoshi cu ta bende productonan cu turista cu ya caba nan posicion di competencia a worde severamente afecta compara cu e otro islanan. E situacion cu gobierno ta bai crea cu “salestax” ta haci costo di bida impagabel y ta bai pone hopi negoshi den problema grandi. E asunto aki ta grave y pueblo y nos economia no por cargue”, mr. Mike Eman a finalisa bisando. |
||||||||||
|
|
||||||||||||
|
||||||||||||
