|
|
|
|||||||||||
|
 |
ORANJESTAD (AAN) -- DIARIO a entrevista señor Rudy Kelly, Hefe di IASA (Imigracion y Warda Nos Costa), ken a elabora riba e trabao di mantencion y ahuste cu a worde haci na Caracas, riba e helicopter cu ta haci patruyahe aereo riba nos isla.
Señor Kelly a indica cu e Helicopter aki a worde hiba Venezuela pa un “check up” y upgrading, y temporalmente el a worde reemplaza pa otro helicopter (color geel), y e trabao aki a dura un tiki mas cu loke originalmente a kere. Diaranzon e helicopter conoci pa nos pueblo, a bin back Aruba despues cu el a worde revisa completamente, y diferente cambio a ser haci den dje. Por ehemplo, a pone un motor nobo den dje, ademas di e sistema di propel na halto cu tambe a worde mehora. Fuera di esaki a extende e capacidad di fuel cu tin abordo, el a bin back cu su luz bao di dje, manera nos hendenan mes ya por a ripara caba.
Actualmente e por bula hopi mas ora cu prome, y un sistema a worde adapta pa duna e personal mas seguridad, unda cu den caso di urgencia, si nan tin cu baha riba awa, por keda flota, aunke e aparato no ta diseña pa baha riba awa pa rescata hende.
E facilidad cu nan a pone acerca ta solamente pa den caso di urgencia e tripulante y pasahero (nan) por sali for di e helicopter. Señor Kelly a indica cu na Januari nan a haci un inventario di tur e trabaonan cu ta worde haci cu e helicopter y aki poco tempo e minister encarga lo trece e rapport concerni den publicidad. Aunke e trabao principal di e helicopter ta pa haci vigilancia riba e costanan di Aruba, tambe brandweer y cierto seccion di polis ta haci uso di dje. Segun sr. Kelly e parti preventivo ta hopi importante, ya cu di Januari pa awor e cantidad di hendenan cu a drenta Aruba via lama, a baha considerablemente, e ta kere cu mas cu 95 porciento. Esaki ta debi na e vigilancia aereo aki, y esaki lo keda mustra ora cu e informe lo ser presenta. Kelly a subraya cu e hendenan cu ta worde gara pa Guardacosta ta personanan cu ta bin den avion y ta keda atras a proposito, y masha poco biaha por gara nan.
E hecho cu durante un periodo corto lo tin un helicopter di reserva, ta pa prevencion cu den caso cu esun cu a caba di worde saca for di hangar (despues di e check up na Caracas) por tin algo chikito cu mester ahusta ainda, locual ta cosnan cu ta sosode cu avionnan grandi mes. Pues, e otro helicopter tey pa “stand by” sin costa gobierno ni un cent extra. Encuanto e aspecto financiero y comparando esaki cu e situacion na Curacao unda cu pa motibo di peso riba presupuesto nan a stop di usa helicopter, sr. Kelly a duna di conoce cu ayanan tabata tin un presupuesto pa seis ora di vuelo pa dia, pero na Aruba ta worde paga pa dos ora diario so. Pa un helicopter bula seis ora pa dia ta hopi dificil pasobra e gastonan ta aumenta substancialmente ora e ta bula mas cu tres ora diario, pasobra mester di dos piloto y dos crew, etc. Na Aruba, a base di conseho, a ser mustra cu dos ora ta factible, y un di e factornan ta cu Aruba su grandura di costa ta casi mitad cu esun di Curacao. Kelly a comenta cu e costo pa Aruba ta 800 mil Florin pa aña, cu ta inclui piloto, fuel, etc. Encuanto e aceptacion for di comunidad, helicopter a bira algo cu tur hende a custumbra cune, y ora e no ta bula e hendenan ta puntra ta kico a pasa y hopi hende ta sinti sigur ora e helicopter ta bulando, segun sr. Kelly a subraya. |
||||||||||
|
|
||||||||||||
|
||||||||||||
