Jan Van Nes:

SEGURIDAD DEN AREA DI HOTELNAN NO POR WORDO CARGA PA SECTOR HOTELERO SO!

Sector comercial tambe por contribui pa ta parti di e solucion 

ORANJESTAD (AAN):  DIARIO a tene ayera un entrevista cu Sr. Jan van Nes relaciona cu un yamada di urgencia cu esnan cu ta forma parti di Aruba su sector turistico, a haci debi na e situacion di inseguridad banda di e high-rise hotelnan cu ta bayendo for di man.

  Den pasado, a bisa, nan a haci e yamada aki caba, pero nan no a haya mucho respuesta.  Nan ta sinti aworaki cu tanto desaroyo, specialmente den e area di high-rise hotelnan ta necesario pa e sector comercial compronde cu e seguridad no por worde carga solamente door di Aruba Hospitality & Tourism Association, AHATA y ATSA pero nan tambe mester contribui pa ta parti di e solucion.

  Sr. van Nes a sigui bisa cu generalmente e contesta cu nan a haya ta cu esaki ta tarea di gobierno y polis. Door cu nan ta pagando belasting esey ta absolve nan di ta parti di e iniciativa aki.

  A subraya cu nan ta lamenta esaki pasobra tin un tarea conhuntamente pa ta parti di e solucion.

  Banda di esaki a expresa cu nan tin ocho aña caba como AHATA y ATSA. Pa algun aña nan tabata den algun negoshi contribuyendo y a sinti cu tabata un iniciativa unico. Ora cu economia a cuminza sinti algun efecto e comerciantenan  a stop di contribui.

  Aworaki cu tin e area di Palm Beach cu ta asina popular te 3 of 4 di madruga ta haci un yamada pa contribui cu un suma  di entre 100 y 300 Florin pa luna di acuerdo cu e volumen di nan negoshi, a indica.

   E problemanan cu tin den e areanan aki ta cosnan cu por worde cataloga como infraccionnan chikito y cu kiermen cu e castigonan lo ta poco. Un persona cu ta comete un atraco ta haya tres luna. E ta siña un tiki mas na KIA, e ta bin ariba caya atrobe locual ta sumamente fastioso, a agrega.

  Van Nes a bisa tambe cu siman pasa tabata tin un guest di Hyatt cu a bira victima di “pick-pocketing” y e mes a dicidi di soluciona esaki, cual a termina den bringamento. E persona aki tabata tin 3 ora so na Aruba. El a haya su pertenencianan back pero por sigura cu e persona aki a pasa den un trauma. 

  Polis a gara e malhechornan den mei ora di tempo pero el a laga un mal impresion atras y loke ta mas preocupante ta cu esaki a pasa den dia cla, entre 4’or y 5’or di atardi. Mayoria di e casonan aworaki ta den dia cla,  a enfatiza.

Back