Diferente compania lo participa den e Mercado di Negoshi organiza pa KvK

ORANJESTAD (AAN): Durante e Mercado di Negoshi cu Camara di Comercio ta organizando pa otro siman, varios compania lo ta participando di dje pa asina ofrece e oportunidad na tur empresario potencial, of cu kier avanza mas den nan negoshi cu informacion, preparacion y ehecucion di nan plannan.

  Entre otro, lo tin presentacion di:

AMTI

Free Zone NV

Vision Marketing Services

PriceWaterhouseCoopers

B/P Interface

Advance Human Resource Services

Camara di Comercio

AIB Bank

RBTT Aruba Bank

Royal & Sun Alliance

Durante e rueda di prensa cu a ser teni ayera mainta na Camara di Comercio, e representante di RBTT Bank a duna di conoce cu nan ta haya cu esaki ta un iniciativa hopi bon mes.

  A señala cu RBTT kier contribui na Aruba door di ta presente tambe na e mercado di negoshi. Nan lo ta bay tin nan ehecutivonan di cuenta eynan pa asina cualkier persona cu kier haya un analisis di nan negoshi y con nan lo por sigui cune pa pasa libremente.

  Banda di esaki, a laga sa cu esnan cu tin gana di lanta un negoshi, RBTT lo por duna nan tipsnan y analisis financiero durante e dia ey.

  AIB Bank, tambe ta un di entidadnan cu lo tin participacion den e mercado di negoshi organiza pa KvK, y un di su representantenan presenta na e rueda di prensa a manifesta cu nan ta hopi entusiasma pa mustra e pueblo di Aruba e productonan cu nan tin pa e entrepreneurnan di Aruba. Nan tin diferente producto, a bisa, cu ta hopi util pa entrepreneurnan.

  A agrega cu prome cu bay un banco, mester prepara un “business plan”, y AIB por yuda hende pa prepare y conseha con pa sigui riba cual ta e mihor manera pa yega na un structura financiero pa un proyecto duradero.

  E diferencia por ehemplo, entre AIB Bank y RBTT Bank ta cu e prome ta focus riba financiamento pa proyectonan mas compleho (minimo 200 mil Florin) y no riba sumanan chikito. A subraya cu tin un limite di inversion cu mester tin pa cu e compania cu ta aplica.

  Otro sponsor di e evento aki ta Royal & Sun Alliance y su representante a expresa cu nan ta prepara pa duna informacion riba loke un persona ta bay tin mester ora di lanta un negoshi y cosnan cu ta bon pa evalue si ta bon si of no.

  A indica tambe cu nan tin paketenan di aseguro cu ta tene cuenta cu tur e necesidadnan basico cu un persona mester. Nan ta spera tambe cu e personanan bira mas conciente y tuma e mihor decision ora di cumpra seguro.

                                                                                         Back