Tene cuidao cu uso inadecua di acetaminophen

FDA TA RESTRINGI DOSIS DI PARACETAMOL DEN PILDORA

Dosis no por supera 650 miligram! 

ORANJESTAD (AAN):  Ya caba DIARIO a publica e relato aki den su seccion Internacional di Diahuebs. E informe  publica riba e website di e Agencia di Alimentonan y Remedinan di Merca (FDA) y cu ta di hopi importancia pa hopi consumidor mester ta na altura di dje  ta cu e dosis maximo di paracetamol (tambe conoci como “acetaminophen”), cual ta un remedi hopi usa,  lo worde reduci den cada analgesico.

   Simplemente bisa, FDA tin miedo cu hendenan ta sigui bira malo y haya problema cu higra, debi cu nan ta bebe demasiado Paracetamol.  Segun FDA,  e interaccion cu otro medicamentonan por provoca overdosis letal cu por mata un pacient.

  Ademas, e consumo di paracetamol a pone cu como 56 mil Mericano a haya nan ta core bay busca auxilio na Servicionan di emergencia cada aña debi na problemanan grave den nan higra, segun e vocero di FDA, Judith Kramer.

  E decision a ser tuma entre un panel di mediconan di FDA y universidadnan mericano  teniendo na cuenta e efectonan secundario di e remedinan.

  Acetaminophen ta e ingrediente clave di Tylenol, Excedrin y otro remedinan pa cura dolornan di cabez y curpa.  E ta e remedi mas utiliza den henter continente mericano.  Pafor di Merca, ta e mas bien conoci como Paracetamol, como tambe Calpol.

   Regulacionnan nobo:  Mediconan di FDA a asegura cu e dosis maximo di paracetamol den cada remedi mester ta di 650 miligram, hopi menos cu e 1.000 miligram cu actualmente un analgesico tin den dje pa trata dolornan, entre otro migraine.

  FDA a agrega cu e dosis di 1000 miligram mester worde bendi unicamente bao di receta di un docter.

  E problema ta cu e remedinan aki por worde haya te hasta den supermarket y hopi hende no ta lesa e recept, locual ta haci e overdosis algo comun, Kramer a expresa.

  E restriccionnan ta alcanza otro remedinan manera esunnan anti-griep.  Esaki ta debi na e hecho cu hopi pacient ta mezcla e analgesiconan cu remedinan contra griep y ta mas facil haya un overdosis.

Back