IPA contento cu IPABILIDAD 2009

MUCHANAN DI SCHOOL PREPARATORIO Y BASICO A GOZA DI DIFERENTE ACTIVIDAD EDUCATIVO 

ORANJESTAD (AAN):  Dialuna 29 y diamars 30 di juni ultimo a tuma lugar IPABILIDAD, un actividad cu IPA ta organiza anualmente pa e schoolnan.

                IPABILIDAD  ta un actividad cu IPA ta organiza pa muchanan di schoolnan preparatorio y basico como muestra di aprecio na e schoolnan pa e cooperacion risibi durante henter aña. Cu IPABILIDAD IPA kier duna algo back na e schoolnan y na nos muchanan.

IPABILIDAD 2009 tabata dos dia yen di actividad organiza pa nos propio studiantenan y docenten di IPA. E aña aki IPA a risibi 12 school y un totaal di 925 mucha reparti entre e dos dianan di actividad.

E 12 schoolnan cu a participa na IPABILIDAD 2009 ta Colegio Sta. Teresita, Commandeur Pieterboer School, Graf von Zinsendorf Kleuter- y Basisschool, Cacique Macuarima, Colegio Frere Bonifacius, Mon Plaisir Basisschool, Colegio Sta. Filomena, Maria Regina School, Arubanita Kleuterschool, school Preparatorio Tarcisius, y school Preparatorio Rayo di Solo.

Tabata tin actividad special pa diferente edad, di kleuter te cu muchanan mas grandi. E muchanan a disfruta di actividadnan manera entre otro un “musical” presenta pa nos studiantenan di promer aña, contamento di storia, weganan educativo diseña/desaroya door di nos studiantenan, actuacion, weganan educativo riba computer y actividadnan deportivo organiza door di studiantenan di e estudio Movecion y Salud.

IPA ta contento con e dianan di e actividad a bay y ta invita e schoolnan di awor caba pa IPABILIDAD 2010. IPA ta agradecido cu tur aña por conta cu e coperacion di e schoolnan y ta spera di por sigui conta cu e coperacion di un y tur den futuro. Un pabien y danki ta bay na tur e studiantenan, docentenan y personal di sosten di IPA cu a duna nan aporte y a haci e dia aki uno hopi exitoso!

Back