Falta di placa den Cuerpo Policial tambe ta afecta sector turistico y comercial

PRACTICAMENTE NO POR CONTA CU PRESENCIA DI POLIS DEN AREA DI HIGH RISE HOTELS PA PERCURA PA SEGURIDAD DI NOS TURISTANAN 

ORANJESTAD (AAN):  Segun Jan van Nes, gerente general di Playa Linda Hotel y tambe miembro di AHATA, tin algun negoshi ubica den e area di high-rise hotels cu ta contribuyendo enormemente cu algun suma pa loke ta seguridad di e area aki.

  A menciona entre otro Moomba Beach, cu ta contribui fielmente cu 300 florin pa luna.  A subraya cu aworaki tin asina tanto negoshi manera restaurantnan cu ta haci bon volumen, tiendanan cu tambe ta hayando bon clientela.

  Segun Van Nes, 100 florin, 200 florin of 300 no ta demasiado pa asina por pone mas placa disponible y contribui na instala sistemanan di camara, entre otro y asina bira parti di e solucion.

  Na e momentonan aki, a bisa, pa loke ta seguridad, e area di hotelnan ta conta cu Visibility Team y Polis. A señala cu un polis ya cana hunto cu un miembro di VT, ya cu e ultimo aki no por cana su so. Esaki ta encera tambe cu ora tin scarcedad den Cuerpo Policial cu automaticamente no por wordo combina cu un persona di seguridad.

  Banda di esaki a manifesta cu antes tabata tin e combinacion pa cada polis tabata tin un CEA y un security guard. Antes tabata tin 18 persona activo den e sector di high rise loke na e momento aki no ta e caso. Si polis no por pone mas cu tres persona,  esnan envolvi den e sector turistico por pone 6 of 9 persona.  Ta keda e hecho cu solamente e security guard por acompaña door di un polis.   

  Jan Van Nes a enfatiza cu nan tin retonan grandi na e momentonan aki unda cu kier mas personanan visible riba e “board walk” y “beach walk”.

  Banda di esaki a laga sa cu nan a ripara cu polis tabata den un proyecto piloto dos siman pasa unda cu por a mira mas polis tambe riba motocicleta. Nan a haya hopi bon comentario riba esaki.

  Tin entendi cu a para e proyecto aki pa falta di finanzas. Atrobe ta yega na e hecho cu placa a caba y e pilot project cu nan tabata spera lo a continua pa e resto di aña a para.

  A añadi cu nan tabata tin e reunion, pero te aworaki cu nan a sinta maha poco resultado tin cu a sali di e reunion cu Conseho di Minister. 

Back