Prijs di petroleo a sigui cay y a perde 4 dollar den 3 dia.

LONDON(AFP)-- Despues di recupera ligeramente diahuebs mainta, prijs di petroleo a bolbe cay pa merdia 12 or treciendo e perdida na casi cuatro dollar den tres dia.

Prome cu 12 or merdia na New York e bari di Light Sweet Crude, pa entrega na Augustus a perde 45 cent y yega na 57,37 dollar den intercambionan electronico.

Dialuna e Light Crude Sweet a bati un record nobo historico yegando na 60,95 dollar pa bari.

Na London  ayera na mes momento cu na New York, e bari di Brent di Noord Zee a baha  cu 46 cent te na 55,69 dollar, leu di su maximo historico di dialuna 59,59 dollar pa bari.

Segun Christopher Bellew, operador di Bache Financial, e mercado ta teme cu e tendencia bahista di ultimo dianan lo sigui, como reaccion, den otro factornan, cu e aumento di reservanan di crudo na Merca, cual su cifranan semanal a ser divulga diaranzon.

Ofensiva americano iraki west di Irak.

BAHGDAD(AFP)-- Infantenan di marina americano y soldatnan iraki a detene ayera 13 sospechoso den marco di e ofensiva contra gueriya den provincia sunita Al Anbar, un dia despues cu Baghdad a yama su bisiñanan pa yuda caba cu inseguridad.

Di otro banda, un responsable iraki a ricibi un delegacion sirio cu a yega Baghdad pa prepara reapertura di embahada di Siria cu ta cera 25 aña caba, na momento cu autoridadnan di Damasco ta ser acusa di ta probecha d infiltracion di combatientenan stranhero na Irak.

Mas o menos 1000 soldat americano y militarnan iraki ta busca activamente  e rebeldenan y combatientenan stranhero sospecha di ta scondi den un sector di provincia Al Anbar, banda di Eufrates entre Haditha y Hit, 260 km y 150 km noordwest di Baghdad.

Cantidad di armamento a ser captura: bomnan mortero, artiyeria, explosivonan , riflenan y material pa traha bom.

E operacion denomina Said, ta tuma lugar despues di otro efectua recientemente den e region di Al Karabila mas na noord, cerca di frontera cu Siria, cu a mata 47 rebelde, y descubri tayernan pa prepara auto bom , segun ehercito americano.

Ta ser supone cu mayoria di combatientenan stranhero, arabe sunita , ta infiltra Irak pa medio di frontera cu Siria.

Siria ta ser acusa pa gobierno interino iraki y pa Merca di ta laga e combatientenan islamista drenta Irak, loke autoridadnan di Damasco ta desmenti.

Relacionnan sirio iraki a keda suspendi na 1980 debi na e apoyo di Damasco na Teheran durante guera di Iran contra Iran.

Ex rehen sueco na Irak kier venga su secuestradornan

STOCKHOLM(AFP)-- Un ex rehen sueco, reteni durante 67 dia na Irak y libera un luna pasa, ta dispuesto di venga su secuestradornan y el a contrata servicio di mercenarionan pa esakinan haci lo necesario pa su secuestradornan “no sigui causa daño”, segun corantnan sueco.

“Mi ta bay pone nan for di wega”, Ulf Hjerstrom di 63 aña di edad cu ta biba na Baghdad 4 aña y traha den sector petrolero, a declara nae corant popular Expressen.

E homber, cu a comparti cel cu e australiano Douglas Wood, libera dos siman despues cu e sueco, despues di 47 dia di cautiverio, tabata mas categorico den su declaracionnan anterior na prensa australiano.

“Actualmente mi tin hende tras di paso di e desgraciadonan. Te awor mi a inverti mas o menos 50 mil dollar y mi lo laga nan paga pa esaki, un pa un”, segun el a declara na cadena di television financiero australiano Ten Network, den declaracionnan reproduci despues pa “sitenan” di internet.

Liberacion di Hjerstrom a ser anuncia recientemente na Suecia pero su secuestro no a ser haci publico.

Segun e relato cu el a duna di su cautiverio, e homber a sufri varios simulacro di ehecucion y a mira otro rehennan ora cu nan a wordo asesina.

Segun e ex rehen, motibo di su secuestro tabata estrictamente delictivo y e no sa si a paga rescate pa su liberacion.

Ecuador ta analiza posibilidad di repatria colombianonan ilegal.

QUITO(AFP)-- Ecuador ta analiza posibilidad di repatria colombianonan ilegal cu segun cifranan no confirma por yega na 700 mil, canciyer Antonio Parra a revela ayera insistiendo den necesidad di impone visa pa e nacionalnan di Colombia.

“Si nan ta emigrantenan ilegal, mester pone nan na frontera”, segun Parra na periodistanan, despues di anota cu “cifranan no confirma di colombianonan ilegal na Ecuador ta menciona mas o menos 400 mil, mientras cu otronan ta bisa cu tin 700 mil . Es decir un promedio di mey miyon.

Datonan oficial ta estima cu na Ecuador ta biba legalmente mas o menos 50 mil colombiano, mientras cu otro 30 mil lo a solicita refugio entre januari 2000 y december 2004, di cualnan Quito a reconoce mas o menos 9000

E aña cu a sinti presencia mas grandi di movimento di refugiadonan colombiano na Ecuador tabata na 2003, cu 11.463 solicitud di cualnan 3270 a ser aproba, segun oficina local di alto Comisionado di Nacionnan Uni pa refugiadonan.

“E situacion na frontera ta bira mas grave dia pa dia y e exodo di colombianonan pa Ecuador mas numeroso. gobierno ta studia seriamente di establece visa pa colombianonan, debi na e situacion aki”, ministro di gobierno y polis di Ecuador Mauricio Gandara a bisa diamars ultimo. 

                                                                                                                Back