Inteligencia italiano tabata conoce plan di CIA di secuestra Iman

WASHINGTON(AFP)-- CIA a informa inteligencia italiano cu nan tabata planea pa secuestra e lider islamico na Milan dos aña pasa, segun e corant Washington Post ayera, citando funcionarionan y ex funcionarionan di e agencia americano.

Ni Italia ni Merca a reconoce oficialmente e secuestro aki, cual aser anuncia diabierna pasa pa e corant Il Corriere della Sera na Roma, señalando cu un huez a dicta orden di aresto contra 13 agente di CIA.

E secuestro a lanta reaccionnan anti americano na Italia.Isama Mustafa Hassan, tambe conoci como Abu Omar, a ser secuestra den un caya di Milan dia 17 di febuari 2003, pa dos homber cu a papia italiano cune y cu a bisa di kier verifica su identidad y for di e dia ey el a desaparece, segun Il Corriere.

Hassan tabata un iman di un mezquita di Milan cu a ser poni bao di vigilancia pisa despues di e atentadonan di dia di september 2001.

Ta ser presumi cu agentenan di CIA a secuestra Hassan y a hiba base militar americano na Aviano, noord di Italia y di eynan pa un prison na Egipto, unda el a wordo tortura durante interogacionnan, segun su colaboradornan.

Huezitaliano Chiara Nobili a emiti un orden di aresto riba solicitud di division antiterrorista di fiscalia di estado, segun Corriere.

Entre e agentenan di CIA cita tin e hefe di operacion cu tabata un diplomatico acredita na consulado americano di Milan na momento di e secuestro, segun e corant italiano basa riba informacinnan di magistradonan milanes.

Almuerzo oficial cancela pasobra iraninan a rechaza sirbimento di alcohol.

BRUSELAS (AFP) -- Un almuerzo cu president di Camera di Diputadonan belga lo a ofrece un delegacion di parlamentarionan irani a keda anula pasobra e invitadonan a nenga pa sirbi alcohol na mesa, segun ee corant belga Den standaard.

Incluso, pa un persona tolerante manera Herman de Croo, “esaki ta bay mucho leu”, segun e propio president di camara, e liberal flamenco Herman de Croo a admiti na e corant.

De Croo tabata pa ofrece un almuerzo awe na un delegacion di parlamentarionan irani, encabeza pa president conservador di parlamento, Gholam ali hadad Adel.

“Mi no a ricibi ningun demanda skirbi, pero indirectamente a yega na mi e peticion pa ningun tipo di alcohol wordo sirbi”, De Croo a declara. Cumindanan coo custumber ta ser acompaña pa biña cu ta ser ofreci na huespednan.

“Diputadonan belga a dicidi cu lo respeta uso y custumbernan occidental. E bishitantenan no ta obliga pa bebe alcohol, pero nos no kier wordo dirigi ni cambia nos custumbernan cu reglanan stranheronan”, segun un portavoz di camara a bisa.

A raiz di e inconveniente aki, desaroyo di e bishita as er modifica y e parlamentarionan lo wordo ricibi awe mainta na Palacio di Nacion, den centro di Bruselas, obviamente sin almuerzo despues.