Ley spaño riba matrimonio gay ta contra Dios y naturaleza

ROMA(AFP)--- Ley spaño cu ta autoriza matrimonio entre homosexualnan ta “contrario na Dios y naturaleza “y ta un consecuencia nefasto di victoria di izquierda den e pais, segun ministro di Reformanan italiano Roberto Calderoli.

“Bon Dios a crea homber y muher  y haciendo esaki el a pone familia den centro di creacion; loke a sosode na Spaña awe, cu aprobacion di e ley cu ta autoriza matrimonionan homosexual, ta e ultimo acto contra Dios y naturaleza”, segun e ministro den un comunicado.

“Esaki ta loke ta sosode ora cu e pueblo ta vota pa izquierda y pone nan den gobierno,  y cu mundo a cuminza bay contra natura”, Calderoli a añadi. E ta miembro di liga di noord, e movimento populista y anti europeo di Umberto Bossi.

“Personalmente, mi ta sigui di ta banda banda di naturaleza y di Bon Dios”, e ministro a conclui entre otro.

Diputadonan spaño a adopta definitivamente ayera e ley cu ta autoriza personanan di e mes sexo casa y adopta yiu, loke a converti Spaña den e di cuatro pais na mundo cu ta legaliza matrimonio entre homosexualnan , despues di Hulanda, Belgica y Canada.

Albert di Monaco por asumi paternidad dia 7 di juli

PARIS(AFP)---Prins Albert II di Monaco por reconoce cu e ta tata di un mucha di casi dos aña, fruto di un relacion cu un stewardes di avion di origen togoles, dia 7 di juli, ora cu e periodo di luto den Principado pa morto di Rainier termina.

Segun Daniel Vaconsin, abogado di Nicole Coste, mama di e baby a informa, su cliente ta spera cu “inpaciencia e fecha dia 7 di juli” y ta confia .

Albert II lo ta entroniza dia 12 di juli y mester duna instruccion panormaliza estado civil di e chiquitin Alexandre, segun e abogado.Segun Vaconsin, Nicole Coste a ser ricibi mey mey di juni pa president di tribunal di Paris pa comunica un reconocimento di paternidad cu Alberto II a realiza na un notario.

“E no tin e documento pa un motibo cla: e notario a indica cu su cliente (Alberto II) tabata pa duna instruccionnan pa normaliza e estado civil di e criatura ora cu e luto na monda termina”, el a splica.

Te ainda familia eal di Monaco no a duna ningun declaracion al respecto ya cu nan ta tene 3 luna di luto pa morto di Prins Rainier cu a muri dia 6 di april.

Helicopter tumba na Afghanistan a ser haya

KABUL(AFP)-- Forzanan americano a localiza ayera e helicopter cu a cay diamars oost di afghanistan, despues di a wordo alcanza pa un disparo di parti insurgentenan taliban.

“Forzanan di caolicion a asegura e zona unda e helicopter a cay dia 28 di juni y nos lo sigui cu evaluacion di e causa di desgracia y e suerte di e 17 militarnan cu tabata a bordo di e helicopter”, un comunicado di e contingente americano na Afghanistan a señala.

E Chinook, un CH-47 di transporte modifica pa ehecuta operacionnan special, a cay diamars atardi west di Asadabad, capital di provincia di Kunar, 150km oost di kabul, den un region di ceronan y yen di mata.

E aparato a cay ora cu e tabata cla padesembarca su ocupantenan den un zona di operacionnan y tabata blanco di disparonan taliban.

Un portavoz di talibannan a reivindica autoria di e atake diamars y afirma cu tur e ocupantenan a muri.