INTERNACIONAL I           

Iraninan ta nenga implicacion di Ahmadinejad den secuestro di americanonan

TEHERAN(AFP)--- Varios irani cu a participa den e asalto di embahada americano na 1979 na Teheran, a desmenti ayera implicacion di president eligi di Iran, Mamoud Ahmadinejad, den e secuestro.

“Ahmadinejad no tabata un di e studiantenan partidario cu a asalta e neishi di spionnan. Nunca e tabata eynan”, segun e ex diputado reformista Mohsen Mirdamadi.

Dia 4 di november 1979, den prome lunanan di Revolucion islamico, studiantenan radical cu a autodenomina nan mes “partidarionan di e caminda di Iman,” a asalta embahada americano cu nan a califica como “neishi di spionnan”.

E toma di rehen a dura 444 dia. Algun di e mas o menos 50 cautivonan a afirma actualmente cu Mahmoud Ahmadinejad, e ultraconservador cu a gana eleccion presidencial na Iran, tabata un di e secuestradornan ,segun testimonionan publica ayera pa washington Times.

Den declaracionnan na AFP, tanto Mohsen Miradamadi como Hachem Afghajari, y Abbas Abdi, dos otro secuestrador, a nenga cu e president eligi tabata presente.

“Esnan cu ta afirma cu e tabata entre e studiantenanta gaña”, Mohsen Miramadi a insisti, y añadi cu e homber cu barba cu ta bayendo cu un rehen cu wowonan tapa, riba un potret divulga riba internet, “tin poco parecido cu e pesident”.

“E foto aki a sembra confusion. Manera mi a bisa, nunca e tabata eynan. Nunca e tabata cunos, ni siquiera ora cu nos tabata conversa riba e tema”, el a declara.

Preocupacion pa libertad religioso na mundo

ROMA(AFP)-- Libertad religioso ta sigui wordo menaza den hopi pais, segun un informe traha pa un asociacion catolico vincula na Vaticano, presenta ayera na Roma, y cu ta acusa Cuba, Colombia, China, Nigeria, y Turquia, tambe Francia, Spaña y Suecia

“Violencia, persecusionan: e situacion di libertad religioso na mundo, ta sigui critico”, e informe anual , realiza pa asociacion “yuda iglesia cu ta sufri” (ACS) ta menciona.

E documento, un guia di 414 pagina den cual e nacionnan ta studia riba orden alfabetico y pa continente, for di Albania pa Vanuatu, a ser presenta na prensa den Camara di Diputadonan di italia pa su president Pier Ferdinando Casini y pa cardenal Renato Martino, president di Conseho pontificio pa husticia y paz di Vaticano.

“E informe 2005 ta basa riba informacionnan directo, testimonionan, documentonan oficial, articulonan di prensa y informacionnan suministra pa organizacionnan cu ta ocupa cu derechonan humano”,  e autornan di e documento a precisa.

“E situacion ta masha grave na China, unda 19 obispo a ser aresta o a impedi nan di eherce nan ministerio”, segun e informe.

E situacion tambe ta grave na Cuba, Colombia, Nigeria y Uganda, segun e texto ta afirma.

Activistanan palestino a afirma di a mata dos soldat israeli.

NAPLUSA(AFP)-- Activistanan palestino a mata dos soldat israeli cu nan a secuestra diahuebs den localidad Cishordania di Naplusa, segun un interlocutor anonimo cu a yama pa telefon na AFP na nomber di dos grupo arma palestino.

“Nos a mata e dos soldatnan cu nos a secuestra na Naplusa”, segun e interlocutor na nomber di dos celula: un di e brigadanan di martirnan di Al Aqsa, un grupo vincula cu Fatah, e movimento di dirigente palestino Mahmud Abas y e otro di e formacion islamista Yihad Islamico.

Anteriormente e persona a reivindica e secuestra di dos militar na Naplusa, pero solamente a menciona nomber di Brigadanan di martirnan di Al Aqsa.

Uribe invita pa bishita rancho di Bush

BOGOTA(AFP)-- President di Merca George W. Bush y e mandatario colombiano Alvaro Uribe, lo reuni dia 4 di augustus na Crawford, Texas, segun embahador na Washington, Luis Alberto Moreno a confirma na periodistanan.

Moreno a señala cu Bush a invita Uribe na su rancho di Crawford, den un gesto di amistad cu e tin cu algun hefe di estado.

“Berdad ta cu ta trata di un tema di amistad di president Bush y president Uribe, kende e mandatario americano ta considera como un di e gran lidernan di mundo, manera por a tende expresa den algun ocasion”, e embahador a bisa na radio Caracol di Bogota.

“Augustus ta un luna di vacasion na Merca y pesident Bush lo traslada su trabao y su oficina pa su rancho na Texas, y eynan e tin diferente reunion y mi ta kere cu e prome encuentro lo ta cu un lider mundial y esaki precisamente ta president di colombianonan”, e aña aki Moreno a splica.

                                                                                                                                                                                                Back