E Caso di Natalee y pueblo Arubiano

   Mi a yega di bisa den hopi ocasion cu na Aruba, Pueblo hopi biaha no ta ser tuma debidamente na cuenta door di autoridad nan, y cosnan cu ta mishi cune directamente, cu su bienestar, e solidez di su economia, su bon nomber como Pueblo hospitalario, ta ser pusha den un skina y dera di tal forma cu e no ta haya sa di dje. E no ta ser haci pa su defensa, sino pa cumpli cu reglanan cu no ta sirbie pasobra nan ta mantene ignorante di loke ta pasando.

   Na DIARIO basta aña pasa nos a tuma e decision di no sconde nada pa Pueblo, di no warda nan den cashi pa despues bente den e pos di olvido. Tur loke nos haya sa nos ta pasa directamente pa Pueblo, pa e ta na altura di loke ta pasa riba su isla.  E caso di Natalee no ta un excepcion, sino e confirmacion cu nos no ta bay tene nada den secreto, y loke cay den nos mannan, nos ta pasa di biaha pa Pueblo, pa e tambe tin e ultimo noticianan pa e por huzga loke a pasa den e caso.

   Ayera nos a publica e transcripcion di e un combersacion cu polis a graba den un auto di polis cu tabata treciendo e tres sospechosonan (Joran, Deepak y Satish) di KIA pa Corte di Husticia, tanto na Hulandes como na Papiamento. E ta un documento hopi revelador di e caracter di e tres sospechosonan, nan manera di papia, nan formulacion di frasenan y nan violencia.

   For di e transcripcion ey nos a haya sa for di boca di Joran cu su tata ta esun cu a pone abogado pa e Kalpoenan; cu Deepak nos a tende cu e ta adverti Joran cu si nan haya e mucha muher cadaver of cualke resto di dje, Joran lo bay cera 15 aña; cu Joran nos a scucha e menaza cu si rumannan Kalpoe papia cu Polis e lo conta nan cu Satish a dal un mucha muher cu auto; en fin, acusacion y contra-acusacion, pero tur basa riba un conocimento categorico cu tur tres tin di loke a pasa cu Natalee. Di esey no tin duda. E ta sali claramente pa dilahti den e transcripcion di e grabacion riba audio-tape.

   E abogado di Joran ta blo ta bati boca na Merca comosifuera e ta un gran Mesias cu sa tur cos; un di su coleganan a acusami di a "leak" e documento, siendo cu ta te antayera nos a haye den nos postbus, despues cu tur e canalnan Americano tabata tine caba y tabata te hasta pasando pida pida di dje; Tacopina ta pinta Joran manera un angel cu halanan di pureza; cu e ta un bon studiante; cu e tin un beca; enfin, cu tur loke e falta pa bula yega cielo ta halanan di sneu. Sin embargo evidencianan recopila pa DIARIO ta pinta un Joran completamente diferente; un hoben

violento; abusador cu muchanan mas chikito na su school (y na su cas!); un hoben sin control cu a mete cu placa di otronan indebidamente; un hoben sin educacion den su forma di papia; un instinto criminal cu el a exhibi den e transcripcion otra cu den momentonan di rabia e kier kibra smul y te hasta a bay asina leu di menaza di mata e dos rumannan Kalpoe; enfin, un potret

completamente diferente di esun di Tacopina.

   Cu ami a revela e nomber di Geoffrey? Si, pasobra esey no ta nada particular. Ningun   momento y ningun caminda a acusa e mucha di a comete cualke infraccion contra Ley; loke nos re-porteronan a haci ta busca su identidad pa nos sa ta di kende nos ta papiando. Hopi hende a puntrami kico mi opinion ta di dje, si e porta meti den e caso. Mi contesta tabata negativo, pasobra mi no ta kere cu e ta meti directamente den e desaparicion di Natalee. Loke si mi ta kere ta cu e por a conta polis o fiscal cu el a mira tal y tal cos, of a scucha tal y tal cos, of tin un video saca e dianan di e desaparicion di Natalee cu por tin imagennan revelador riba dje. Esey mi ta kere ta posible, pero no cu e ta un participante den e desaparicion mes. Mi por ta completamente

ekiboca, pero esey ta loke mi ta pensa.

  Ami no ta kita mi wowonan for di e tres sospechosonan, Joran, Deepak y Satish, pasobra nan a demostra den e grabacion cu nan ta completamente al tanto di loke a pasa e mucha muher.

Ademas, un ta acusa otro (entre Joran y e rumannan Kalpoe) di un castigo di 15 aña (Deepak contra Joran) si haya e mucha muher, y e trapamento di un mucha muher cu auto (Joran contra

Satish)..

    Nos tarea como medio di comunicacion ta pa keda al tanto di tur e desaroyonan entorno di e caso y pasa cualke informacion cu nos haya pa Pueblo, pasobra den nos criterio, e tin derecho

ariba tur informacion di loke ta pasa riba su isla. Cu polls of fiscal no kier siek ningun informacion ta nan bon derecho, pero esey no ta conta pa DiARIO!